ದ್ರಾಕ್ಷಿ ಬೆಳೆಗಾರ ಸಂಕಷ್ಟಕ್ಕೆ ಉತ್ತರ – ಒಣ ದ್ರಾಕ್ಷಿ.

ಮಣಕ ಅಥವಾ ಒಣ ದ್ರಾಕ್ಷಿ  ಮಾಡಿದರೆ ಅದನ್ನು ಹೆಚ್ಚು ಸಮಯದ ತನಕ ದಾಸ್ತಾನು ಇಟ್ಟು ಮಾರಾಟ ಮಾಡಬಹುದು. ಇದಕ್ಕೆ ಮಧ್ಯವರ್ತಿಗಳು, ದಾಸ್ತಾನುಗಾರರು, ಚಿಲ್ಲರೆ ಮಾರಾಟಗಾರರು ಬೇಕಾಗಿಲ್ಲ. ನೀವು  ಬುದ್ದಿವಂತರಾಗಿದ್ದರೆ ಆನ್ ಲೈನ್ ಮೂಲಕ ನೇರವಾಗಿ ಗ್ರಾಹಕರಿಗೆ  ಮಾರಾಟ ಮಾಡಬಹುದು.

• ಸರಕಾರ ದ್ರಾಕ್ಷಿ ಬೆಳೆಗಾರರ ಸಮಸ್ಯೆ ನಿವಾರಣೆಗೆ ವೈನರಿಯನ್ನು ಎಲ್ಲಾ ತೆರೆಯುವಂತೆ ಸೂಚಿಸಿದೆಯಂತೆ.
• ಈ ವೈನರಿಗಳು ಕೊಡುವ ಬೆಲೆ ಬರೇ ಜುಜುಬಿ.
• ಅದರ ಬದಲು ಮಣಕ ಮಾಡಿದರೆ ಲಾಭ ಹೆಚ್ಚು.

ಉತ್ತರ ಕರ್ನಾಟಕದ ಬಿಜಾಪುರ, ಬಾಗಲಕೊಟೆಯ ದ್ರಾಕ್ಷಿ ಬೆಳೆಗಾರರು ತಾವು ಬೆಳೆದ ದ್ರಾಕ್ಷಿಯನ್ನು ತಾಜಾ ಹಣ್ಣಾಗಿ ಮಾರಾಟ ಮಾಡುವುದಲ್ಲ.

• ಅರ್ಧಕ್ಕೂ ಹೆಚ್ಚಿನ ದ್ರಾಕ್ಷಿಯನ್ನು  ಮಣಕ ಅಥವಾ ಒಣ ದ್ರಾಕ್ಷಿ ಮಾಡಿ ನಂತರ ಬೇಡಿಕೆ ಹೊಂದಿ ಮಾರಾಟ ಮಾಡುತ್ತಾರೆ. 
• ಬಹುತೇಕ ದ್ರಾಕ್ಷಿ ಬೆಳೆಗಾರರು ಸಮೀಪದ  ಕೋಲ್ಡ್ ಸ್ಟೋರೇಜ್ ನಲ್ಲಿ ತಮ್ಮ ಒಣ ದ್ರಾಕ್ಷಿಯನ್ನು ಇಟ್ಟು ಕೊಂಡಿರುತ್ತಾರೆ.
• ಸರಿಯಾಗಿ ಸಾಮಾಜಿಕ ಮಾಧ್ಯಮಗಳಲ್ಲಿ ಪ್ರಚಾರ ಕಾರ್ಯ ಕೈಗೊಂಡರೆ ಒಣ ದ್ರಾಕ್ಷಿ ಮಾರಾಟಕ್ಕೆ ಈಗ ಕಷ್ಟ ಇಲ್ಲ.

ಒಣ ದ್ರಾಕ್ಷಿ ಹೇಗೆ:

• ದ್ರಾಕ್ಷಿ ಹಂದರದಲ್ಲಿ ಸ್ವಲ್ಪ ಬೇಗ ಬೆಳೆ ಬಂದರೆ ಆಗ ಅದಕ್ಕೆ  ತಾಜಾ ಹಣ್ಣಾಗಿ ಬೇಡಿಕೆ ಇರುತ್ತದೆ.
• ಮಾರ್ಚ್ ತನಕ ಬಿಜಾಪುರದ ದ್ರಾಕ್ಷಿಗೆ ತಾಜಾ ಹಣ್ಣಾಗಿ ಬೇಡಿಕೆ.
• ನಂತರ  ಬೆಂಗಳೂರಿನ ದ್ರಾಕ್ಷಿ ಮಾರುಕಟ್ಟೆಗೆ ಬರುತ್ತದೆ.
• ಇಲ್ಲಿಯ  ದ್ರಾಕ್ಷಿ ಮಣಕ ಆಗುತ್ತದೆ.

• ಚೆನ್ನಾಗಿ ಹಣ್ಣಾದ  ದ್ರಾಕ್ಷಿಯನ್ನು  ಮಾತ್ರ ಮಣಕ ಮಾಡಲು ಬಳಸಲಾಗುತ್ತದೆ.
• ತಡವಾಗಿ ಕೊಯಿಲು ಮಾಡಬೇಕು. ಆಗ ಅದರ TSS  ( ಸಕ್ಕರೆ ಪ್ರಮಾಣ) ಉತ್ತಮವಾಗಿರುತ್ತದೆ.
• ಕೊಯಿಲು ಮಾಡಿದ ದ್ರಾಕ್ಷಿಯಲ್ಲಿ ಹಾಳಾದುದನ್ನು ಪ್ರತ್ಯೇಕಿಸಿ  ನೀರಿನಲ್ಲಿ ತೊಳೆದು ನಂತರ 100 ಲೀ ನೀರಿಗೆ 1 ಲೀ. ಈಥೇಲ್ ಓಲಿಯೇಟ್ ಮತ್ತು 2 ಕಿಲೊ ಪೊಟ್ಯಾಶಿಯಂ ಕಾರ್ಬೋನೇಟ್ ನಲ್ಲಿ 2-3 ನಿಮಿಷ ಅದ್ದಿ ( ಈಗ ಡಿಪ್ಪಿಂಗ್ ಆಯಿಲ್ ಎಂಬುದು ಸಿಗುತ್ತದೆ).
• ಅದನ್ನು ಒಣಗಿಸುವ ಚಪ್ಪರದಲ್ಲಿ ಗೊಂಚಲುಗಳನ್ನು ತೆಳುವಾಗಿ ಹರಡಬೇಕು. 
• ಹೀಗೆ ಇಟ್ಟಂತದ್ದನ್ನು ಅಗತ್ಯ ಇದ್ದರೆ ಮೇಲೆ ಕೆಳಗೆ ವರ್ಗಾಯಿಸಬೇಕಾಗುತ್ತದೆ.  
• ಸುಮಾರು 15-20  ದಿನಗಳಲ್ಲಿ ಇದು ಒಣಗುತ್ತದೆ.

ಎರಡನೆಯ ಪದ್ದತಿ ಕೊಯಿಲು ಮಾಡಿದ ದ್ರಾಕ್ಷಿಯನ್ನು ಯಾವುದೇ ರಾಸಾಯನಿಕ ದ್ರಾವಣದಲ್ಲಿ ಅದ್ದದೆ ನೀರಿನಲ್ಲಿ ತೊಳೆದು ಒಣಗಿಸುವುದು. ಇದಕ್ಕೆ ಕೆಲವು  ಕಡೆ ಮಾರುಕಟ್ಟೆ ಇದೆ. ಇದು  ಉತ್ತಮ ಗುಣಮಟ್ಟದ ದ್ರಾಕ್ಷಿಯಗಿರುತ್ತದೆ.

• ಮೊದಲ ಕ್ರಮದಲ್ಲಿ ಒಣಗಿಸಲ್ಪಟ್ಟ ದ್ರಾಕ್ಷಿ ಹಳದಿ ಬಣ್ಣದಲ್ಲಿ ಪಾರದರ್ಶಕವಾಗಿರುತ್ತದೆ.
• ಎರಡನೇ ವಿಧಾನದಲ್ಲಿ ಒಣಗಿಸಿದ ದ್ರಾಕ್ಷಿ ಹಸುರು ನೈಸರ್ಗಿಕ ಬಣ್ಣದಲ್ಲಿರುತ್ತದೆ.

ವಿಜಯಪುರ ಒಣ ದ್ರಾಕ್ಷಿಗೆ ಪ್ರಸಿದ್ಧಿ:

• ಒಣಗಿಸಲ್ಪಟ್ಟ ದ್ರಾಕ್ಷಿ ಗೂಂಚಲು ಕಬ್ಬ್ಬಿಣದ ಮೆಶ್ ನ ಹಂದರದಲ್ಲಿರುವಾಗ  ಎರಡು ಕಬ್ಬಿಣದ  ಪಟ್ಟಿ ರಾಡ್ ಅನ್ನು  ಕೀಳಗೆ ಮೇಲೆ ಇಟ್ಟು ಎರಡೂ ಕಡೆಯಲ್ಲಿ ಹಿಡಿದು  ಎಳೆದಾಗ ಗೊಂಚಲಿನಿಂದ ದ್ರಾಕ್ಷಿ ಹಣ್ಣುಗಳು ಬಿಡುತ್ತವೆ.
• ಇದನ್ನು ನಂತರ ಬೇರೆ ವ್ಯವಸ್ಥೆಗೆ ಸಾಗಿಸಲಾಗುತ್ತದೆ.
• ಬಿಜಾಪುರ  ರಾಜ್ಯದ ಒಣ  ಪ್ರದೇಶ.ಇಲ್ಲಿ ಅತಿಯಾದ ಬಿಸಿಲು ಇರುವ ಕಾರಣ ಇಲ್ಲಿನ ದ್ರಾಕ್ಷಿ  ಮಣಕ ಮಾಡಲು ಚೆನ್ನಾಗಿ ಹೊಂದಿಕೆಯಾಗುತ್ತದೆ.

• ಇಲ್ಲಿ ಮಣಕ ಮಾಡುವ ವ್ಯವಹಾರವನ್ನೇ ಮಾಡುವ ಹಲವು ಜನ ಇದ್ದಾರೆ.
• ಕೆಲವು ರೈತರೂ ಸಹ ಮಾಡುತ್ತಾರೆ. ಬೇರೆ ಬೇರೆ ಊರುಗಳಿಂದ ತಂದು ಇಲ್ಲಿ ಒಣಗಿಸುವುದೂ ಇದೆ.

ಚಪ್ಪರ:

• ಇದು ಕಬ್ಬಿಣದ ರಾಡ್ ಮತ್ತು ಮೆಶ್ ಹಾಕಿ ಮಾಡಿದ ಚಪ್ಪರ.
• ಇದರ ಮೇಲೆ ಕಪ್ಪು ನೆರಳು ಬಲೆಯನ್ನು ಹಾಕಿರುತ್ತಾರೆ.
• 12 ಅಂತಸ್ತು ತನಕ  ದ್ರಾಕ್ಷಿಯನ್ನು ಹಾಕುತ್ತಾರೆ.
• ಕೆಲವರ ಒಣಗಿಸುವ ಚಪ್ಪರ ಅರ್ಧ ಎಕ್ರೆಗೂ ಹೆಚ್ಚು ವಿಸ್ತಾರದಲ್ಲಿರುತ್ತದೆ.

ಒಣಗಿದ ನಂತರ ಹಣ್ಣುಗಳನ್ನು ಯಂತ್ರಕ್ಕೆ ಹಾಕಿ ಅದನ್ನು  ಗಾರ್ಬಲಿಂಗ್ ಮಾಡಲಾಗುತ್ತದೆ. ಗಾರ್ಬಲಿಂಗ್ ಮಾಡಿದಾಗ ದೊರೆಯುವ ಬೇರೆ ಬೇರೆ ಗುಣಮಟ್ಟದ್ದನ್ನು ಪ್ರತ್ಯೇಕ ಪ್ರತ್ಯೇಕ ಪ್ಯಾಕ್ ಮಾಡಿ ಬೇರೆ ಬೇರೆ ಬಳಕೆಗೆ ವರ್ಗಾಯಿಸುತ್ತಾರೆ.

• ಮಣಕ ಮಾಡಿದ ದ್ರಾಕ್ಷಿಯನ್ನು  ನಮ್ಮ ಸಾಮಾನ್ಯ ವಾತಾವರಣದಲ್ಲಿ ಇಡಲಿಕ್ಕೆ ಆಗುವುದಿಲ್ಲ.
• ಅದಕ್ಕೆ ಶಿಲೀಂದ್ರ ಬರುತ್ತದೆ. ಅದನ್ನು 5 ಡಿಗ್ರಿ  ತಂಪು ಇರುವ ಶೀತಲ ಗ್ರಹದಲ್ಲಿ ದಾಸ್ತಾನು ಇಡುತ್ತಾರೆ.
• ಇದು ವರ್ಷಗಳ ತನಕವೂ ಹಾಳಾಗುವುದಿಲ್ಲ.

ಕರ್ನಾಟಕ ಸರಕಾರವು ರೈತರು ಬೆಳೆದ ಉತ್ಪನ್ನವನ್ನು ಶೀತಲ ಗೃಹದಲ್ಲಿ ಇಡುವರೇ ಈ ವರ್ಷ ಯಾವುದೇ ಶುಲ್ಕ ವಿಧಿಸಬಾರದು ಎಂದಿರುವ ಕಾರಣ ಇದು ರೈತರಿಗೆ ಅನುಕೂಲಕರ. ಹಣ್ಣು ದ್ರಾಕ್ಷಿಯಲ್ಲಿ ನಷ್ಟವಾದುದನ್ನು ಇದರಲ್ಲಿ ಪಡೆಯುವ ಗುರಿಯನ್ನು ಇಟ್ಟುಕೊಳ್ಳಿ.