ಅಡಿಕೆ – ಕಬ್ಬು ಬೆಳೆಯ ಬೇರು ದುಂಬಿ ನಿಯಂತ್ರಣ.

by | May 23, 2020 | Arecanut (ಆಡಿಕೆ), Pest Control (ಕೀಟ ನಿಯಂತ್ರಣ) | 0 comments

ಅಡಿಕೆಗೆ ಮಾತ್ರ ಬೇರು ಹುಳದ ಕಾಟ ಅಲ್ಲ. ಕಬ್ಬು, ಹಿಪ್ಪು ನೇರಳೆ ಹೀಗೆ ಬಹಳಷ್ಟು ಬೆಳೆಗಳಿಗೆ ಈ ಹುಳದ ಕಾಟ ಇದೆ. ಇದರ ದುಂಬಿಗಳು ಈಗ ಹೊರಗೆ ಹಾರಾಡುವ ಸಮಯ. ಈಗ ಅದನ್ನು ನಿಯಂತ್ರಿಸುವ ಉಪಾಯ ಇದು.ಮರದ ಆರೋಗ್ಯಕ್ಕೆ  ಮತ್ತು ಬೆಳೆವಣಿಗೆಗೆ  ಆಧಾರವೇ ಅದರ ಬೇರು. ಆ ಬೇರನ್ನು ತಿನ್ನುವ ಒಂದು ಹುಳ ಅದನ್ನು ಏಳಿಗೆಯಾಗಲು ಬಿಡುವುದಿಲ್ಲ. ಕೆಲವು ಮಣ್ಣಿನಲ್ಲಿ ಈ ಬೇರು ಹುಳದ ಸ್ತೊಂದರೆ ಹೆಚ್ಚು. ಮತ್ತೆ ಕೆಲವು ಕಡೆ ಕಡಿಮೆ. ಬೇರು ಹುಳಗಳನ್ನು  ಒಡಿಸದಿದ್ದರೆ ಅಡಿಕೆ ಬೆಳೆಯೇ ವ್ಯರ್ಥ. ಈ ಸಮಯದಲ್ಲಿ ಈ ಬೇರು ದುಂಬಿಯನ್ನು ಓಡಿಸುವ ಕ್ರಮ ಯಾವುದು?

root eating beetle

  •  ನಮ್ಮ ಪರಿಸರದಲ್ಲಿ ನೂರಾರು ನಮೂನೆಯ ಬೇರು ಹುಳಗಳಿವೆ.
  • ಅವೆಲ್ಲಾ ಬೇರೆ ಬೇರೆ ಮರಗಳ ಬೇರನ್ನು ತಿನ್ನುತ್ತವೆ.
  • ಅಡಿಕೆ ಮರದ ಬೇರು ತಿನ್ನುವ ಹುಳ ಬೇರೆ.
  • ಅದೇ ರೀತಿಯಲ್ಲಿ ಅದು ಪ್ರಾದೇಶಿಕವಾಗಿಯೂ ಪ್ರಭೇಧ ಬೇರೆ ಬೇರೆ ಬೇರೆ ಇರುತ್ತದೆ.
  • ಸಪ್ಟೆಂಬರ್ ನಿಂದ ಜನವರಿ ತನಕ ಹುಳ ಹಂತದಲ್ಲಿರುತ್ತವೆ. ನಂತರ ಪ್ಯುಫೆ ಆಗಿ ದುಂಬಿಯಾಗುತ್ತದೆ.
  • ಒಂದು ಮಳೆ ಬಂದರೆ ಸಾಕು  ಅವು ಜೋಡಿಯಾಗಲು ಹೊರ ಹಾರುತ್ತವೆ.
  • ಈ ಸಮಯದಲ್ಲಿ ದುಂಬಿ ನಾಶ ಒಂದೇ ಉಪಾಯ.

ಬೇರು ಹುಳದ ಪತ್ತೆ:

Holes where root grub exists

  • ಬೇರು ಹುಳವು ಕೇವಲ ಅಡಿಕೆಗೆ ಮಾತ್ರವಲ್ಲ, ತಾಳೆ ಜಾತಿಯ ಇತರ ಮರಗಳು, ಕೊಕ್ಕೋ, ಕಾಫೀ, ರಬ್ಬರ್, ಕಬ್ಬು, ಹಲಸು, ಮುಂತಾದವುಗಳಿಗೂ ಹಾನಿ ಮಾಡುತ್ತದೆ.
  • ಮರಗಳು ಕಳೆಗುಂದಿದ್ದರೆ ಅದರ ಬುಡವನ್ನು ಆಗಸ್ಟ್ ನಿಂದ ಅಕ್ಟೋಬರ್ ತನಕ ನೆಲವನ್ನು  ಸುಮಾರು 1/2 ದಿಂದ 3/4 ಅಡಿ ತನಕ ಅಗೆದು ನೊಡಿದರೆ ಬುಡದಲ್ಲಿ ಗೊಬ್ಬರದ ಹುಳುವಿನಂತ ಹುಳು ಕಾಣಸಿಗುತ್ತದೆ.
  • ಮೇ ತಿಂಗಳಿನಿಂದ ಜೂನ್ ಜುಲಾಯಿ ತನಕ ನೆಲದಲ್ಲಿ  ತೂತುಗಳು ಕಂಡುಬಂದು ಸಂಜೆ ದುಂಬಿಗಳು ಹಾರುತ್ತವೆ.
  • ಒಂದು ಮಳೆ ಬಂದ ದಿನ ಸಂಜೆ ಹೊತ್ತು ತೋಟಕ್ಕೆ  ಹೋದರೆ ಅಲ್ಲಿ ಕೆಲವು ಗಿಡಗಳ ಮೇಲೆ ದುಂಬಿಗಳು ಕುಳಿತಿರುತ್ತವೆ.
  • ಅವು ಹಾರುವುದೂ ಇರುತ್ತದೆ. ಕೆಲವೊಮ್ಮೆ ಒಂದು ಎರಡು ದುಂಬಿಗಳು ಮನೆ ಪಕ್ಕದಲ್ಲಿ ತೋಟ ಇದ್ದರೆ ದೀಪದ ಬೆಳೆಕಿಗೂ ಅವು ಬರುವುದುಂಟು.

ಹೇಗೆ ನಿಯಂತ್ರಣ:

Pesticide sprayed to kill beetles

  • ಹುಳುಗಳನ್ನು ನಿಯಂತ್ರಣ ಮಾಡುವುದು ಈಗ ಅಲ್ಲ. ಈಗ ಹುಳುಗಳು  ಇರುವುದೂ ಇಲ್ಲ.
  • ಈಗ ಅವು ದುಂಬಿಗಳಾಗಿ ಹೊರ ಹಾರಿ ಸಂತಾನೋತ್ಪತ್ತಿ ಮಾಡುವ ಸಮಯ.
  • ಈಗ ಏನಿದ್ದರೂ ದುಂಬಿಗಳನ್ನು ನಾಶ ಮಾಡಬಹುದೇ ಹೊರತು ಹುಳ ಕೊಲ್ಲುವುದು ವ್ಯರ್ಥ ಪ್ರಯತ್ನ.
  • ನೀರು ಕೆಳಗೆ ಹೋದಂತೇ ಹುಳಗಳು ಕೋಶಾವಸ್ಥೆಗೆ ಹೋಗುವ ಕಾರಣ ನಂತರ ಕಾಣಲು ಸಿಗುವುದು ಅಪರೂಪ.
  •  ಎಪ್ರೀಲ್ ನಿಂದ-ಜೂನ್ ತಿಂಗಳಿಗೆ ಒಂದು ಮಳೆ ಬಿದ್ದ ತಕ್ಷಣ, ಅವು ಕೋಶಾವಸ್ಥೆ ಬಿಟ್ಟು ಪ್ರೌಢ ಕೀಟಗಳಾಗುತ್ತವೆ. ಆ ಸಮಯದಲ್ಲಿ ದುಂಬಿಯಾಗಿ ಹೊರಗೆ ಹಾರಲಾರಂಭಿಸುತ್ತವೆ.

ಬೇರು ಹುಳದ ಪ್ರಕಾರಗಳು:

Root grub of Arecanut

  • ಬೇರು ಹುಳಗಳದ್ದು ನಾಲ್ಕು ಹಂತದ ಜೀವನ ಕ್ರಮ. ಒಂದು ಮೊಟ್ಟೆ, ನಂತರ ಮರಿ(ಹುಳು)ತದನಂತರ ಕೋಶ (ಪ್ಯೂಪೆ) ಆನಂತರ ದುಂಬಿ.
  • ದುಂಬಿಯಾಗಿ ಗಂಡು ಹೆಣ್ಣು ಕೂಡಿ ಮತ್ತೆ ಮಣ್ಣಿನಲ್ಲಿ ಮೊಟ್ಟೆ ಇಡುತ್ತದೆ.
  • ಬೇರು ಹುಳದಲ್ಲಿ ಮೂರು ಪ್ರಭೇಧಗಳನ್ನು ಕಾಣಬಹುದು. ಲ್ಯುಕೊಪೋಲಿಸ್  ಕೊನಿಯೋಪೆರಾ, leucopholis coneophora ಲ್ಯುಕೊಪೋಲಿಸ್ ಬರ್ಮಿಸ್ಟೆರಿ, leucopholis burmeisteri  ಇವು  ಕರಾವಳಿ ಮತ್ತು ಮಲೆನಾಡಿನಲ್ಲಿ ಅಡಿಕೆ ಮರದ ಬೇರನ್ನು ತಿಂದರೆ ಲ್ಯುಕೊಪೋಲಿಸ್  ಲೆಪಿಡೋಪೆರಾಗಳು. leucopholis lepidophora.
  • ಇದು ಕಬ್ಬು ಮತ್ತು ಬಯಲು ಸೀಮೆಯಲ್ಲಿ ಅಡಿಕೆ ಮರದ ಬೇರನ್ನೂ ತಿನ್ನುತ್ತವೆ.
  • ಇದರಲ್ಲಿ ಮೊದಲನೆಯದರ ಜೀವನ ಚಕ್ರ ಒಂದು ವರ್ಷವಾದರೆ ಮತ್ತೆರಡರದ್ದು ಎರಡು ವರ್ಷ.
  • ಮೊಟ್ಟೆ , ಮರಿ ಹಾಗೂ ಕೋಶಗಳು ಯಾವಾಗಲೂ ಮಣ್ಣಿನಲ್ಲಿ ಇರುತ್ತವೆ.
  • ಹೆಚ್ಚಾಗಿ ಕಾಣ ಸಿಗುವುದು ಮಳೆಗಾಲ ಮುಗಿಯುವಾಗ. ನಂತರವೂ ಸಿಗುತ್ತದೆ.
  • ಪ್ರಮಾಣ ತುಂಬಾ ಕಡಿಮೆ. ದುಂಬಿಗಳು ಮಾತ್ರ ವರ್ಷದ ನಿರ್ದಿಷ್ಟ ಸಮಯದಲ್ಲಿ ಮುಸ್ಸಂಜೆ ಅಥವಾ ರಾತ್ರೆ ಹೊತ್ತು ಮಣ್ಣಿನಿಂದ ಹೊರ ಹಾರಿ ಲೈಂಗಿಕ ಸಂಪರ್ಕ ಹೊಂದುತ್ತವೆ.

sugarcane root grub

ಬೇರು ದುಂಬಿ ನಾಶ ಮಾಡುವುದು:

ROOT GRUB ATTACHED SUGARCANE

  • ಬೇರು ಹುಳದ ದುಂಬಿಯನ್ನು ತಜ್ಞರು ಸಂಜೆ ಹೊತ್ತು ಹೊಂಚು ಹಾಕಿ ಹಿಡಿದು ಕೊಲ್ಲಬೇಕು ಎನ್ನುತ್ತಾರೆ.
  • ಆದರೆ ಅದು ಈಗಿನ ಕಾಲದಲ್ಲಿ ಅಸಾಧ್ಯವಾದ ಮಾತು.
  • ಮುಸ್ಸಂಜೆ ಹೊತ್ತಿನಲ್ಲಿ ತೋಟದಲ್ಲಿ ಟಾರ್ಚ್ ಬೆಳೆಕಿನಲ್ಲಿ ದುಂಬಿಗಳನ್ನು ಹುಡುಕಿ ಕೊಂದು ಸಾಯಿಸಿದರೆ ಸಾಕಷ್ಟು ಸಂಖ್ಯೆಯಲ್ಲಿ ಅದರ ಸಂತಾನೋತ್ಪತ್ತಿ ನಿಯಂತ್ರಣವಾಗುತ್ತದೆ ಎನ್ನುತ್ತಾರೆ.
  • ಇದು ಸತ್ಯವಾದರೂ ಪಾಲಿಸಲು ಕಷ್ಟ.
  • ಬೇರು ದುಂಬಿಗಳು ತೋಟದ ಬದುಗಳಲ್ಲಿರುವ ಗ್ಲೆರಿಸಿಡಿಯಾ, ಹೊಂಗಾರೆ( ಹಾಲುವಾಣ) ನುಗ್ಗೆ, ಬೇವು, ಹಿಪ್ಪು ನೇರಳೆ ಮರಗಳ ಎಲೆಗಳಲ್ಲಿ ನೇತಾಡುತ್ತಿರುತ್ತವೆ. ಇದನ್ನು  ಅಲ್ಲೇ ಸಾಯಿಸುವುದು ಸಾಧ್ಯವಿದೆ.
  • ಇಡೀ ತೋಟಕ್ಕೆ ಮಲ್ಚಿಂಗ್ ಶಿಟು  ಹಾಕಿದಾಗ ಬೇರು ದುಂಬಿ ಸಂತಾನಾಭಿವ್ರುದ್ದಿಯಾಗಲು ಅವಕಾಶ ಸಿಗದೆ ಅವು ನಾಶವಾಗುತ್ತವೆ ಎನ್ನುತ್ತಾರೆ ಸಿದ್ದಾಪುರದ ಅರುಣ್  ಹೆಗಡೆಯವರು..
  • ತೋಟದ ಬದುವಿನಲ್ಲಿರುವ ಮರಗಳಿಗೆ ಸಸ್ಯಗಳಿಗೆ ಮಧ್ಯಾನ್ಹದ ನಂತರ ಕ್ಲೋರೋಫೆರಿಫೋಸ್ ಅಥವಾ ಮೊನೋಕ್ರೋಟೋಫೋಸ್ ಕೀಟನಾಶಕವನ್ನು  ಸಿಂಪಡಿಸಿರಿ.
  • ಒಂದು ವೇಳೆ ಮರ ಮಟ್ಟು ಇಲ್ಲವಾದರೆ ಗೆಲ್ಲುಗಳನ್ನು  ಕದಿದು ತಂದು ಹಾಕಿ ಸಿಂಪರಣೆ ಮಾಡಿ.
  • ಕೀಟನಾಶಕ ಎಲೆಗಳಿಗೆಲ್ಲಾ  ಬೀಳಬೇಕು. ಹಾರಿ ಬಂದು ಆಶ್ರಯ ಪಡೆಯುವ ದುಂಬಿಗಳಿಗೆ ಈ ಕೀಟನಾಶಕವು ವಿಷಕಾರಿಯಾಗಿ ಅದು ಸಾಯುತ್ತದೆ. ಇದು  ಸರಳ ಮತ್ತು ಸುಲಭದ ಉಪಾಯ.

ಬೇರು ಹುಳವನ್ನು ಕೊಲ್ಲುವುದೇ ಆಗಿದ್ದಲ್ಲಿ ಆ ಕಾರ್ಯವನ್ನು ಸಪ್ಟೆಂಬರ್ ತಿಂಗಳಿನಿಂದ ನವೆಂಬರ್ ತಿಂಗಳ ತನಕ ಮಾತ್ರ ಸಾಧ್ಯ. ಅದಕ್ಕೆ ಕೆಲವು ಜೈವಿಕ ನಿಯಂತ್ರಕಗಳು ಇವೆ. ಅದನ್ನು ಆ ಸಮಯದಲ್ಲಿ ತಿಳಿಸುತ್ತೇವೆ.

  • ಲಕ್ಕಿ ಗಿಡ ಮತ್ತು ನೆಕ್ಕಿ ಗಿಡದ ಸಾರದಿಂದ ತಯಾರಿಸಿದ ಸಸ್ಯ ಔಷಧಿ ವಿಟೆಕ್ಸ್ ನೆಗುಂಡ ಅಥವಾ ನಿಂಬಿಸಿಡಿನ್ (ಬೇವು ಆಧಾರಿತ ಕೀಟನಾಶಕ) 2% ದಂತೆ ಬೇರು ವಲಯಕ್ಕೆ ಜೂನ್ ತಿಂಗಳಲ್ಲಿ  ಹೊಯ್ಯುವುದರಿಂದ ಮೊಟ್ಟೆಗಳು, ಸಣ್ಣ ಮರಿಗಳು ನಾಶವಾಗುತ್ತವೆ.

ಈ ಸಮಯದಲ್ಲಿ ದುಂಬಿಗಳ ನಾಶಕ್ಕೆ  ಬೇಕಾದ ಕಾರ್ಯವನ್ನು ಮಾಡಿದರೆ ಮಾತ್ರ ಅದು ಫಲಕಾರಿ. ಯಾರೋ ಹೇಳಿದರು ಎಂದು ಅದಕ್ಕೆ  ಜೈವಿಕ ಉಪಚಾರ  ಈಗ ಮಾಡಬೇಡಿ. ಅದನ್ನು ಮಾಡುವುದಾದರೆ ಮೊಟ್ಟೆ ಇಟ್ಟು ಮರಿ ಆದ ನಂತರ ಮಾಡಬೇಕು.           

0 Comments

Submit a Comment

Your email address will not be published.

Get in Touch

For all kinds of inquiries, regarding the Krushiabhivruddi website and its other media channels, including corporate advertising contact us on 

[email protected]
+91-9663724066

ಒಂದು ಎಕ್ರೆಯಲ್ಲಿ ಮಿಶ್ರ ಬೆಳೆಯಿಂದ ಕನಿಷ್ಟ 3 ಲಕ್ಷ ಆದಾಯ ಗಳಿಸುವ ರೈತ.

Categories

error: Content is protected !!