ತೆಂಗಿನ ಗಿಡ ಯಾಕೆ ಫಲಕೊಡುವುದಿಲ್ಲ.

ತೆಂಗಿನ ಸಸಿಗಳಲ್ಲಿ ಗಿಡ್ದ, ಎತ್ತರದ ತಳಿಗಳು ಎಂಬ ಎರಡು ಬಗೆ. ಗಿಡ್ಡ ತಳಿಗಳು ನಾಟಿ ಮಾಡಿ ಮೂರು ವರ್ಷಕ್ಕೆ ಹೂ ಗೊಂಚಲು ಬಿಟ್ಟರೆ ಎತ್ತರದ ತಳಿ ನಾಟಿ ಮಾಡಿ 5  ವರ್ಷಕ್ಕೆ ಹೂಗೊಂಚಲು ಬಿಡುವುದು ವಾಡಿಕೆ.

• ಕೆಲವೊಮ್ಮೆ ಇದು ತಡವಾಗಬಹುದು, ಬೇಗವೂ ಆಗಬಹುದು.
• ಆದರೆ ಕೆಲವು ಮರಗಳು ತಮ್ಮ ಜೀವನ ಪರ್ಯಂತ ಇಳುವರಿ ಕೊಡುವುದೇ ಇಲ್ಲ. ಕಾರಣ ಅದರ ವಂಶ ಗುಣ.
• ತೆಂಗಿನ ಸಸಿ ಇಳುವರಿ ಪ್ರಾರಂಭಿಸುವುದಕ್ಕೆ ತಳಿ ಗುಣದ ಜೊತೆಗೆ ಆರೈಕೆಯೂ ಅಗತ್ಯ.
• ಪ್ರಾರಂಭಿಕ ಆರೈಕೆ ತಳಿಗುಣವನ್ನು ಬೆಂಬಲಿಸುತ್ತದೆ.
• ತಳಿ ಗುಣ ಸರಿಯಾಗಿಲ್ಲದಿದ್ದರೆ ಯಾವ ಆರೈಕೆಯೂ ಫಲಿಸದು.
• ಆದುದರಿಂದ ನೆಡುವ ತೆಂಗಿನ ಸಸಿಯ ತಳಿಗುಣವನ್ನು ಸ್ವಲ್ಪವಾದರೂ ತಿಳಿದೇ ನಾಟಿ ಮಾಡುವುದು ಉತ್ತಮ.

ಏನು ತಳಿ ಗುಣ:

• ಸಸಿ (ಬೀಜ) ಆರಿಸುವಾಗ ತಾಯಿ ಮರ  ಆಯ್ಕೆ  ಪ್ರಮುಖ ಅಂಶ.
• ಆರೋಗ್ಯವಂತ ತಾಯಿ ಮರದಿಂದ ಬೀಜದ ಆಯ್ಕೆ ಮಾಡಿರಬೇಕು. 
• ಬೀಜ ಆಯ್ಕೆ ಮಾಡುವ ಮರದ ಸುತ್ತಮುತ್ತ  ಅನುತ್ಪಾದಕ, ತೀರಾ ಕಡಿಮೆ ಇಳುವರಿ ಕೊಡಬಲ್ಲ, ಬೆಳವಣಿಗೆ ನ್ಯೂನತೆ ಉಳ್ಳ. ಪೊಳ್ಳು ಕಾಯಿ ಬಿಡುವ ಮರಗಳು ಇರಬಾರದು.
•   ಕೇರಳದ ಕುಟ್ಯಾಡಿ ಎಂಬಲ್ಲಿ ಈ ರೀತಿಯಲಿ  ಬೀಜದ ಕಾಯಿಗಳನ್ನು ಆರಿಸುವ ವಿಧಾನ ಸುಮಾರು 25  ವರ್ಷದ ಹಿಂದೆ ನೋಡಿದ್ದೇನೆ.

ಯಾವಾಗಲೂ ಬೀಜ ತಂದು ಸಸಿ ಮಾಡುವುದು ಒಳ್ಳೆಯದು. ತೀರಾ ನಂಬಿಗಸ್ತರಾಗಿದ್ದರೆ ಮಾತ್ರ ಸಸಿಯನ್ನು ತರಬಹುದು.ಹಾಗೆಂದು ಸಸಿಯಲ್ಲಿ ಅನುತ್ಪಾದಕ ಸಸ್ಯಗಳಾಗುವ ಪ್ರಮಾಣ ಗರಿಷ್ಟ ಶೇ. 5 ಕ್ಕಿಂತ ಹೆಚ್ಚು ಇಲ್ಲ.ಕಡಿಮೆ ಇಳುವರಿಯವು ಸ್ವಲ್ಪ ಹೆಚ್ಚು ಇರುತ್ತದೆ. 

• ಬೀಜವನ್ನೇ ತರುವಾಗ ಮರಗಳನ್ನು ಅವರವರೇ ಗಮನಿಸಬಹುದು.

• ಮರದ ಗರಿಯ ಬಣ್ಣ ಮತ್ತು ನಾವು ಬೀಜ ತಂದು ಸಸಿ ಮಾಡುವಾಗ ಅದರಲ್ಲಿ ಬರುವ ಎಲೆಗಳ ಬಣ್ಣ ಏಕಪ್ರಕಾರವಾಗಿದ್ದರೆ ಅದು ತಾಯಿ ಮರದ ನೈಜ ಗುಣವನ್ನು ಹೊಂದಿದೆ ಎಂದು ಭಾವಿಸಬಹುದು.
• ಒಂದು ವೇಳೆ ಸ್ವಲ್ಪ ಬಣ್ಣ ವ್ಯತ್ಯಾಸ ಬಂದರೆ ಅದು ಮಿಶ್ರ ಪರಾಗ ಸ್ಪರ್ಶ ಆಗಿರುವ ಸಾಧ್ಯತೆ ಹೆಚ್ಚು.
• ಇದು ಸುತ್ತಮುತ್ತ ಇರುವ  ಮರದ ಮಿಶ್ರ ಪರಾಗ ಸ್ಪರ್ಶದಿಂದಾಗಿ ಆದದ್ದು.

• ಇದು ನೈಸರ್ಗಿಕ ಸಂಕರಣ ತಳಿಯಾಗಿರುತ್ತದೆ.
• ಆದರೆ ಇಳುವರಿ ಕೊಡುವ ಅವಧಿಯನ್ನು ಇದರ ಮೇಲೆ ಅಂದಾಜು ಮಾಡಲು ಬರುವುದಿಲ್ಲ.
• ಸುತ್ತಮುತ್ತ ಒಳ್ಳೆಯ ಇಳುವರಿ ಕೊಡುವ ಮರಗಳೇ ಇದ್ದರೆ ಆ ಸಸ್ಯ  ಬಹುತೇಕ ಉತ್ತಮ ಇಳುವರಿಯನ್ನೇ ಕೊಡುತ್ತದೆ.

ತೆಂಗಿನಲ್ಲಿ ತಳಿಗೆಳೆಷ್ಟು:

• ತೆಂಗಿನಲ್ಲಿ ಎತ್ತರ ಮತ್ತು ಗಿಡ್ಡ ಎಂಬ ಎರಡು ವರ್ಗಗಳಲ್ಲದೆ  ಲಕ್ಷಾಂತರ ಸಂಖ್ಯೆಯ  ನೈಸರ್ಗಿಕ ಪರಾಗಸ್ಪರ್ಶದಿಂದಾಗಿ  ಉಂಟಾದ ತಳಿಗಳಿವೆ.
• ಇದರಲ್ಲಿ ತಳಿ ಮೇಲ್ದರ್ಜೆಗೆ ಏರಿರಲೂಬಹುದು, ಕುಂಠಿತವಾಗಿರಲೂ ಬಹುದು.
• ಹಸುರು ಬಣ್ಣದ ಗರಿಯ ಮರಗಳು, ಹಸುರು ಮಿಶ್ರಕಂದು, ಕೆಂಪು ಮಣ್ಣಿನ ಬಣ್ಣದ ಹೀಗೆಲ್ಲಾ ವ್ಯತ್ಯಾಸಗಳಾದುದು ಹಲವಾರು ವರ್ಷಗಳಲ್ಲಿ ನೈಸರ್ಗಿಕ ಮಿಶ್ರ ಪರಾಗಸ್ಪರ್ಶದಿಂದ.
• ಒಟ್ಟಿನಲ್ಲಿ ನಾವು ಆಯ್ಕೆ ಮಾಡುವ ತಳಿಗಳಲ್ಲಿ ಹೈಬ್ರಿಡ್ ಹೊರತಾಗಿ ಯಥಾವತ್ ಮಾತೃ ಗುಣ ಹೊಂದಿದ ತಳಿ ಎಂದು ಹೇಳುವಂತಿಲ್ಲ.

ಯಾಕೆ ಅನುತ್ಪಾದಕವಾಗುತ್ತದೆ:

• ಬೀಜದ ಆಯ್ಕೆ ಮಾಡುವಾಗ ಪಾಲಿಸಬೇಕಾದ ನಿಯಮಗಳನ್ನು ಅನುಸರಿಸದೇ ಇದ್ದಲ್ಲಿ ಹೀಗಾಗುತ್ತದೆ.
• ಉತ್ತಮ ಇಳುವರಿ ಕೊಡಬಲ್ಲ ಮರದ ಸುತ್ತಮುತ್ತ ಯಾವುದಾದರೂ ಅನುತ್ಪಾದಕ ಮರ ಇದ್ದರೆ,
• ಅದರಿಂದ ಮಿಶ್ರ ಪರಾಗಸ್ಪರ್ಶ ಹೊಂದಿ ಬೀಜ ನ್ಯೂನ್ಯತೆಗೊಳಗಾಗಬಹುದು.
• ಅದು ಅನುತ್ಪಾದಕವಾಗಲೂಬಹುದು.

ಬೀಜದ ಕಾಯಿಯನ್ನು ಯಾವಾಗಲೂ ಮರದಿಂದ ಇಳಿಸಬೇಕು. ತುಂಬಾ ಎತ್ತರದ ಮರಗಳಿಂದ ಅದನ್ನು ಕೆಳಕ್ಕೆ ಹಾಕಿದರೆ  ಬೀಜದ ಬ್ರೂಣಕ್ಕೆ ಘಾಸಿಯುಂಟಾಗುವ ಸಾಧ್ಯತೆಯೂ ಇಲ್ಲದಿಲ್ಲ. ಬ್ರೂಣಕ್ಕೆ ಘಾಸಿ (ಶಾಕ್) ಉಂಟಾದರೆ ಅದರಲ್ಲಿ ಇಳುವರಿ ಅಥವಾ ಬೆಳೆವಣಿಗೆ ನ್ಯೂನತೆ ಉಂಟಾಗುವ ಸಾಧ್ಯತೆ ಇದೆ.  

• ತೆಂಗಿನ ತೋಟ ಮಾಡುವವರಿಗೆ ತಾವು ಬೆಳೆಸುವ ಹತ್ತಾರು ಮರಗಳಲ್ಲಿ ಒಂದು ಎರಡು ಅನುತ್ಪಾದಕ ಮರಗಳಾದರೆ ಆದರೆ ಅದನ್ನು ಕಡಿದು ತೆಗೆಯಬಹುದು.
• ಮನೆ ಹಿತ್ತಲಲ್ಲಿ ನೆಟ್ಟು ಬೆಳೆಸುವವರಿಗೆ ಹೀಗಾದರೆ ತುಂಬಾ ನಷ್ಟ.
• ಅವರು ಖಾತ್ರಿಯ ಇಳುವರಿ  ಕೊಡಬಲ್ಲ ಹೈಬ್ರೀಡ್ ತಳಿಯನ್ನು ಆಯ್ಕೆ ಮಾಡುವುದು ಸೂಕ್ತ.

ಉತ್ತಮ ಸಸ್ಯದ ಆಯ್ಕೆ ವಿಧಾನ:

• ಸಸ್ಯವನ್ನೇ ಆಯ್ಕೆ ಮಾಡುವಾಗ ಮುಖ್ಯವಾಗಿ ಗಮನಿಸಬೇಕಾದ್ದು,
• ಆ ಸಸ್ಯದ ಬುಡದ ದಪ್ಪ. ಸುಮಾರು 6 ತಿಂಗಳ ಸಸ್ಯ ಹೆಬ್ಬೆರಳು ಮತ್ತು ತೋರುಬೆರಳಿನ ಮಧ್ಯದ ಅವಕಾಶದಷ್ಟಾದರೂ ದಪ್ಪ ಇರಬೇಕು.

•  ಸಸಿಯಲ್ಲಿ ನಾಲ್ಕು ಎಲೆಗಳಾದರೂ ಇರಬೇಕು.
• ಕೊನೆಯ ಅರಳಿದ ಎಲೆಯಲ್ಲಿ ಗರಿಗಳು ಕಡ್ಡಿ ಬಿಟ್ಟಿರಬೇಕು.
• ತೀರಾ ದೊಡ್ದ ಸಸಿಯನ್ನು ಆಯ್ಕೆ ಮಾಡುವುದು ಸೂಕ್ತವಲ್ಲ.
• ಮನೆ ಹಿತ್ತಲಿನಲ್ಲಿ ಒಂದೆರಡು ಸಸಿ ನೆಡುವವರು ಗಿಡ್ದ ಜಾತಿಯ ತಳಿಗಳಾದ ಕಿತ್ತಳೆ ಹಳದಿ ಹಸುರು,(ಚೌಘಾಟ್ಆರೆಂಜ್, ಚೌ.ಯಲ್ಲೋ, ಗ್ರೀನ್ ಡ್ವಾರ್ಪ್ ಮುಂತಾದ ಕೆಲವು ತಳಿಗಳಿದ್ದು,
• ಅದನ್ನು ಆರಿಸಿದರೆ ಅದರಲ್ಲಿ ತಳಿ ವ್ಯತ್ಯಾಸ ಬರುವುದು ಕಡಿಮೆ.
• ಕಾರಣ ಇವು ಹೆಚ್ಚಾಗಿ ಸ್ವಕೀಯ ಪರಾಗಸ್ಪರ್ಶಕ್ಕೆ ಒಳಗಾದವುಗಳಾಗಿರುತ್ತವೆ.
• ಆದರೂ ಇದು 100% ಖಾತ್ರಿಯಲ್ಲ.

ತೆಂಗಿನ ತೋಟ ಮಾಡುವವರು ಬೀಜವನ್ನು ಪ್ರಾದೇಶಿಕತೆಗೆ ಹೊಂದುವ ಉತ್ತಮ ಬೀಜವನ್ನು ಆಯ್ಕೆ ಮಾಡಿ, ಅವರೇ ಸಸಿ ಮಾಡಿಕೊಂಡು ಅದರಲ್ಲಿ ಉತ್ತಮ ಶಕ್ತಿಯುತ ಸಸಿಗಳನ್ನು ಮಾತ್ರ ನಾಟಿಗೆ ಬಳಸುವುದು ಉತ್ತಮ.

ತೆಂಗಿನ ಸಸಿ ನೆಟ್ಟು ಉತ್ತಮ ಆರೈಕೆ ಮಾಡಿದಾಗ 6 ವರ್ಷದ ಒಳಗೆ ಇಳುವರಿಗೆ ಪ್ರಾರಂಭವಾಗುತ್ತದೆ. ಆಗದಿದ್ದರೆ ಅದನ್ನು ಅನುತ್ಪಾದಕ ಎಂದು ಪರಿಗಣಿಸಬಹುದು.ಗರಿಗಳು ಅಗಲಕ್ಕೆ ಬಿಡಿಸಿ ಬೆಳೆಯುವ ಸಸಿ ಇಳುವರಿ ಕೊಡುವ ಸಾಧ್ಯತೆ ಹೆಚ್ಚು. ನೇರವಾಗಿ ಬೆಳೆಯುವವು ಅನುತ್ಪಾದಕವಾಗುವ ಸಾಧ್ಯತೆ ಹೆಚ್ಚು.

 end of the article: ———————————————————
search words: why coconut palm unprductive?  # less productivity of coconut palm# Coconut# good yield of coconut# seed selection# coconut plant#