ತೆಂಗಿನ ಮರಕ್ಕೆ ನೀರು ಹೆಚ್ಚು ಕೊಟ್ಟರೆ ಉತ್ತಮ !

by | Jan 9, 2020 | Krushi Abhivruddi | 0 comments

ಕೆಲವು ಪ್ರದೇಶಗಳಲ್ಲಿ ಬೇಸಿಗೆಯಲ್ಲಿ ಬಿಡುವ ಹೂ ಗೊಂಚಲಿನಲ್ಲಿ ಕಾಯಿಯೇ ಇರುವುದಿಲ್ಲ. ಒಂದೆರಡು ಎಳನೀರು ತೆಗೆಯಲೂ ಸಿಗುವುದಿಲ್ಲ. ಸಿಕ್ಕ ಎಳನೀರಿನಲ್ಲಿ ಬೊಗಸೆಯಷ್ಟೂ ನೀರು ಇರುವುದಿಲ್ಲ. ಇದಕ್ಕೆ ಕಾರಣ ಆ ಸಮಯದಲ್ಲಿ ಮರಕ್ಕೆ ಸಾಕಷ್ಟು ತೇವಾಂಶ ಲಭ್ಯವಾಗದೇ ಇರುವುದು !

  • ಕೆಲವು ಪ್ರದೇಶಗಳಲ್ಲಿ ಬೇಸಿಗೆ, ಮಳೆಗಾಲ ಎರಡೂ ಕಾಲಾವಧಿಯಲ್ಲೂ ಏಕ ಪ್ರಕಾರ ಕಾಯಿ ಇರುತ್ತದೆ.
  • ಆದುದರಿಂದಲೇ ಅಂಗಡಿಗಳಲ್ಲಿ ಬೇಸಿಗೆಯಲ್ಲಿ ಎಳನೀರು ಕುಡಿಯಲು ಸಿಗುತ್ತಿದೆ.

healthy leaf indicates its yield  character

  • ಒಂದು ತೆಂಗಿನ ಮರಕ್ಕೆ ದಿನಕ್ಕೆ 30-40  ಲೀ. ನೀರು ಸಾಕು ಎನ್ನುತ್ತಾರೆ.
  • ಆದರೆ ಅಷ್ಟು ನೀರು ಸಾಕಾಗುವುದಿಲ್ಲ. ದಿನಕ್ಕೆ ಕನಿಷ್ಟ ಪಕ್ಷ  100 ಲೀ. ನಷ್ಟು ನೀರು ಬೇಕಾಗುತ್ತದೆ.
  • ನೀರು ಕೊಡುವ ಉದ್ದೇಶ ತೆಂಗಿನ ಮರದ ಸುಮಾರು 3-4 ಮೀ ಸುತ್ತಳತೆಯವರೆಗಿನ ಮಣ್ಣು ತೇವವಾಗಿ ಸಡಿಲವಾಗಿರಲು.
  • ತೇವಾಂಶ ಇದ್ದರೆ ಮಾತ್ರ ಮಣ್ಣು ಸಡಿಲವಾಗಿರುತ್ತದೆ. ಮಣ್ಣು ಸಡಿಲ ಇದ್ದರೆ ಮಾತ್ರ ಬೇರುಗಳು ಸುಲಲಿತವಾಗಿ ಬೆಳೆದು ಮರಕ್ಕೆ ನೀರಿನ ಪೂರೈಕೆ ಮಾಡುತ್ತಿರುತ್ತವೆ.

ಹೆಚ್ಚು ನೀರು ಯಾಕೆ ಬೇಕು:

  • ತೆಂಗಿನ ಮರ ವರ್ಷದ 12 ತಿಂಗಳಲ್ಲೂ  ಹೂ ಗೊಂಚಲು ಬಿಡುವ ಸಸ್ಯ.
  • ಪ್ರತೀ ಹೂ ಗೊಂಚಲಿನಲ್ಲಿ ಸರಾಸರಿ 25 ಕ್ಕೂ ಹೆಚ್ಚು ಕಾಯಿಯಾಗುವ ಮಿಡಿಗಳು ಇರುತ್ತವೆ.
  • ನೀರಿನ ಲಭ್ಯತೆ ಧಾರಾಳ ಇದ್ದಾಗ ಅದರಲ್ಲಿ ಹೆಚ್ಚಿನವು ಕಾಯಿ ಕಚ್ಚಿ ಕೊಳ್ಳುತ್ತವೆ. ಕಡಿಮೆಯಾಗುವ ಸಮಯದಲ್ಲಿ ಹೆಚ್ಚಿನವು ಉದುರುತ್ತವೆ.

inter crops make garden cool temperature

  • ಮಳೆಗಾಲ ಪ್ರಾರಂಭದ ಸಮಯ ಮತ್ತು ಮಳೆಗಾಲ ಮುಗಿಯುವವರೆಗಿನ ಅವಧಿಯಲ್ಲಿ  ಹೊರ ಬರುವ ಹೂ ಗೊಂಚಲಿನ ಕಾಯಿಗಳು ಹೆಚ್ಚು ಕಾಯಿ ಕಚ್ಚುತ್ತವೆ.
  • ಚಳಿಗಾಲದ ನಂತರ ಮೇ ತಿಂಗಳವರೆಗೆ ಬಿಡುವ ಹೂ ಗೊಂಚಲಿನಲ್ಲಿ  ಕಾಯಿಗಳು ತುಂಬಾ ಕಡಿಮೆ ಇರುತ್ತವೆ.
  • ಎಲ್ಲಿ ಧಾರಾಳ ನೀರಿನ ಲಭ್ಯತೆ   ಇರುತ್ತದೆಯೋ ( ಕಾಲುವೆ ನೀರು, ಹರಿ ನೀರು) ಅಲ್ಲಿ  ವರ್ಷದ ಎಲ್ಲಾ ತಿಂಗಳುಗಳಲ್ಲಿ ಬರುವ ಹೂ ಗೊಂಚಲುಗಳಲ್ಲಿ ಹೆಚ್ಚು ಕಾಯಿ ಕಚ್ಚಿ ಅಧಿಕ ಫಸಲು  ಇರುತ್ತವೆ.

ಅಧಿಕ ಇಳುವರಿ- ನೀರು:

  • ತೆಂಗು ಬೆಳೆಯುವ ಕರಾವಳಿಯ  ತೀರ ಪ್ರದೇಶಗಳಲ್ಲಿ ಹೆಚ್ಚು ಇಳುವರಿ ದೊರೆಯುತ್ತದೆ.
  • ಕಾರಣ ಇಲ್ಲಿ ವಾತಾವರಣದಲ್ಲಿ ತೇವಾಂಶ ಜೊತೆಗೆ ನೀರಿನ ಮಟ್ಟ ತುಂಬಾ ಮೇಲೆ ಇರುತ್ತದೆ. ಮಣ್ಣು ತುಂಬಾ ಸಡಿಲವಾಗಿದ್ದು ಬೇರುಗಳು 5 ಮೀ. ತನಕವೂ ಹಬ್ಬಿರುತ್ತದೆ.
  • ತೆಂಗು ಬೆಳೆಯುವ ತಿಪಟೂರು, ಅರಸೀಕೆರೆ, ಚಿತ್ರದುರ್ಗದ ಕೆಲ ಭಾಗಗಳು, ಮಂಡ್ಯ, ಮೈಸೂರುಗಳಲ್ಲಿ  ತೆಂಗಿನಲ್ಲಿ ಅಧಿಕ ಇಳುವರಿ ಬರುತ್ತದೆ.
  • ಇಲ್ಲಿ ನೀರನ್ನು ಯಥೇಚ್ಚವಾಗಿ ಕೊಡುತ್ತಾರೆ ಮತ್ತು ಮಣ್ಣು ತುಂಬಾ ಸಡಿಲವಾಗಿರುವ ಕಾರಣ  ಬೇರಿನ ಬೆಳವಣಿಗೆ ಹೆಚ್ಚು ಇರುತ್ತದೆ.
  • ತಮಿಳುನಾಡಿನ ಪೊಲ್ಲಾಚಿ ಊರಿನಲ್ಲಿ ಶೇ.90  ತೆಂಗು ಬೆಳೆಗಾರರು ಹರಿ ನೀರಾವರಿಯಲ್ಲೇ ತೆಂಗು ಸಾಕುವುದು.
  • ಇಲ್ಲಿ ದಿನಕ್ಕೆ  10-15  ಲೋಡು ಎಳನೀರು ನೆರೆ ರಾಜ್ಯಗಳಿಗೆ ಹೋಗುತ್ತದೆ.

healthy coconut palm

  • ಕರಾವಳಿಯ ಒಳನಾಡು ಮತ್ತು ಇತರ ಪ್ರದೇಶಗಳಲ್ಲಿ  ಮಳೆ ಬಂದ ತಕ್ಷಣ ಮಣ್ಣು ಮೆದುವಾಗಿ ಸಡಿಲವಾಗುತ್ತದೆ.
  • ಆಗ ಬೇರುಗಳು ಹೆಚ್ಚು ವಿಸ್ತಾರಕ್ಕೆ  ಬೆಳೆಯುತ್ತದೆ. ಹೆಚ್ಚು ಪೋಷಕಗಳನ್ನು ಹೀರಿಕೊಳ್ಳುತ್ತವೆ.
  • ಆ ಸಮಯದಲ್ಲಿ  ಮಾತ್ರ  ಹೂ ಗೊಂಚಲಿನ ಮಿಡಿಗಳು ಹೆಚ್ಚಿನ ಪ್ರಮಾಣದಲ್ಲಿ ಕಚ್ಚಿಕೊಳ್ಳುತ್ತವೆ.
  • ಎಲ್ಲೆಲ್ಲಿ ನೆಲದ ಮಣ್ಣು ತುಂಬಾ ಸಡಿಲವಾಗಿ ಇರುತ್ತದೆಯೊ,  ಉದಾಹರಣೆಗೆ – ಭತ್ತದ ಬೇಸಾಯ ಮಾಡುವ ಹೊಲದ ಬದಿ ಮತ್ತು ಹೊಳೆ ಹಳ್ಳದ ಬದಿಯಲ್ಲಿ,  ಸಮುದ್ರ ತೀರದಲ್ಲಿ ತೆಂಗಿನಲ್ಲಿ ವರ್ಷಪೂರ್ತಿ ಹೂ ಗೊಂಚಲಿನಲ್ಲಿ ಕಾಯಿಗಳಿರುತ್ತವೆ.

ಹೇಗೆ ನೀರು ಕೊಡಬೇಕು:

  • ನೀರಾವರಿ ಮಾಡುವಾಗ ಬುಡ ಭಾಗ ಒಂದೇ ಕಡೆ ಒದ್ದೆಯಾಗುವಂತೆ  ಕೊಡುವುದು  ಹೆಚ್ಚಿನ ಕಡೆಯಲ್ಲಿ ಹೊಂದಿಕೆಯಾಗಲಾರದು.
  • ಎಷ್ಟು ವಿಸ್ತಾರದ ತನಕ ಬೇರು ಹಬ್ಬಿದೆಯೋ ಆ ತನಕದ ಮಣ್ಣು ತೇವವಾಗಿರುವಂತೆ  ನೀರುಣಿಸುವ ವ್ಯವಸ್ಥೆ  ಬೇಕು.
  • ಆಗ ಬೇರುಗಳು ಹೆಚ್ಚು ಹೆಚ್ಚು ಆಹಾರವನ್ನು ಹೀರಿಕೊಳ್ಳುತ್ತವೆ.
  • ಬಬ್ಲರ್ ಮೂಲಕ ನೀರುಣಿಸುವುದು ಉತ್ತಮ.
  • ಹನಿ ನೀರಾವರಿಯಲ್ಲಿ ಮರಕ್ಕೆ 4-6 ತನಕ ಡ್ರಿಪ್ಪರನ್ನು ಸುತ್ತಲೂ ಹಂಚಿ ಹಾಕಬೇಕು.
  • ಮೈಕ್ರೋ  ಟ್ಯೂಬ್ ಆಗಿದ್ದಲ್ಲಿ ಮರದ ನಾಲ್ಕೂ  ದಿಕ್ಕಿಗೆ ಬೀಳುವಂತೆ  ಅಳವಡಿಸಿಕೊಳ್ಳಬೇಕು.
  • ಹೀಗೆ ವ್ಯವಸ್ಥೆ ಇದ್ದರೆ, ಕಾಯಿ ಹೆಚ್ಚಿನ ಪ್ರಮಾಣದಲ್ಲಿ ಕಚ್ಚಿಕೊಳುತ್ತದೆ.
  • ಮೇಲ್ಮಣ್ಣು ಹೆಚ್ಚು ತೇವವಾಗಿರಬೇಕು. ಮೇಲಿನ 1 ಅಡಿ ತನಕದ ಮಣ್ಣಿನಲ್ಲಿ ಆಹಾರ ಹೀರಿಕೊಳ್ಳುವ ಬೇರುಗಳು ಕ್ರಿಯಾತ್ಮಕವಾಗಿರುತ್ತದೆ.
  • ಅಲ್ಲಿ ಬೇರುಗಳು ನಿಬಿಡವಾಗಿರುತ್ತದೆ.
  • ತೆಂಗಿನ ಮರಕ್ಕೆ ನೆಲದ ಮೇಲುಭಾಗ  ಒದ್ದೆಯಾಗುವ ತರಹದ ನೀರಾವರಿ ವ್ಯವಸ್ಥೆಯನ್ನು ಮಾಡಿಕೊಳ್ಳಬೇಕು.
  • ಅದು ಗರಿಗಳು  ಹಬ್ಬಿರುವ ತನಕ ಇರಬೇಕು.
  • ತೆಂಗಿನ ಮರದ ಬುಡ ಭಾಗ ಬೇಸಿಗೆಯ ಸಮಯದಲ್ಲಿ ಯಾವುದೇ ಕಾರಣಕ್ಕೆ  ಬಿಸಿಲಿಗೆ ತೆರೆದುಕೊಳ್ಳದಂತೆ ಮಾಡಬೇಕು.
  • ಸಾವಯವ ತ್ಯಾಜ್ಯಗಳನ್ನು ಹಾಕಿ  ತೇವಾಂಶ ಉಳಿಯುವಂತೆ  ಮಾಡಬೇಕು.
  • ಈ ರೀತಿ ನಿರ್ವಹಣೆ ಮಾಡುವುದರಿಂದ ಮರದಲ್ಲಿ ಬೇಸಿಗೆ ಮತ್ತು ಮಳೆಗಾಲದಲ್ಲಿ ಏಕ ಪ್ರಕಾರ ಕಾಯಿ ಕಚ್ಚಿಕೊಳ್ಳುತ್ತದೆ. ಇಳುವರಿ ಹೆಚ್ಚುತ್ತದೆ.

ಒಂದು ತೆಂಗಿನ ಮರ ವರ್ಷಕ್ಕೆ  ಕನಿಷ್ಟ 200 ಕಾಯಿಯ ಇಳುವರಿ ಕೊಡುವಷ್ಟು ಸಮರ್ಥ ಇರುತ್ತದೆ. ಇದು ನಮ್ಮ ಬೇಸಾಯ  ಕ್ರಮದಲ್ಲಿ  ಇದೆ.

0 Comments

Submit a Comment

Your email address will not be published.

Get in Touch

For all kinds of inquiries, regarding the Krushiabhivruddi website and its other media channels, including corporate advertising contact us on 

[email protected]
+91-9663724066

ಒಂದು ಎಕ್ರೆಯಲ್ಲಿ ಮಿಶ್ರ ಬೆಳೆಯಿಂದ ಕನಿಷ್ಟ 3 ಲಕ್ಷ ಆದಾಯ ಗಳಿಸುವ ರೈತ.

Categories

error: Content is protected !!